Ресей үкіметі Қиыр Шығысқа көмек көрсету туралы шешім қабылдайды

Ресей Федерациясының үкіметі Қиыр Шығыстың табиғи апаттардан зардап шеккен аймақтарына көмек көрсетуге қатысты бірден бірнеше маңызды шешім қабылдамақ. Бұл туралы министрлер кабинетінің кезекті отырысында Ресей премьер-министрі Дмитрий Медведев айтты.

Үкімет 2013 жылдың бюджетіне көмектің осы түріне қаражат бөлуді қарастыратын кейбір түзетулер енгізеді. «Қиыр Шығыс аймағындағы бірінші кезектегі қажеттілік мәселелерін шешуге ақшалай қаражат бөлінеді. Атап айтқанда, бұл облыстағы су тасқынының зардаптарын жою шараларына қатысты. Бұл мәселені шешуге шамамен 40 миллиард рубль бөлінеді», — деді Дмитрий Медведев.

Сондай-ақ ол бюджет жобасына енгізіліп жатқан өзгерістер зардап шеккен өңірлер бюджетінің жалпы теңгеріміне қосымша қаржылай көмек көрсету, әскери қызметшілерге тұрғын үй салу, мүгедектер қорын құру мәселелерін де қадап айтты.

Үкіметте мектепке дейінгі балалары бар, зейнеткерлер мен мүгедектер бар отбасылар туралы қаулы жобасы да қаралады. Тұрғындардың бұл санаты жөндеу-құрылыс жұмыстары кезеңіне уақытша демалыс үйлері мен санаторийлерде тұруға ауыстырылады. Бұл мақсаттарға 600 миллион рубль көлемінде қаражат бөлу жоспарлануда. Су тасқынынан ең көп зардап шеккен аймақтар Еврей автономиялық облысы, Хабаровск өлкесі және Амур облысы болды.

Мүлігінен толық айырылған халықтың бір бөлігіне көмек көрсету үшін 3 миллиард рубльден астам қаражат бағытталады. 900 миллион рубль табиғи апат салдарынан егіні өлген ауыл шаруашылығы тауар өндірушілерінің мәселесін шешуге бағытталады.