Бурятияда экологиялық таза қалдықтарды өңдейтін зауыт пайда болады

Республикада маңызды экологиялық жоба жүзеге асырылады: мұнда қалдықтарды өңдейтін зауыт пен шағын ЖЭО салынады.

Бурятияның ресми интернет-порталының хабарлауынша, республика үкіметі бұл жобаны жүзеге асыру үшін Ресей Федерациясы Табиғат министрлігінен қолдау алды.

Бұл өңірде мұндай зауыт салу қажеттілігі әлдеқашан көтерілген. Өйткені, Бурятия ерекше аймақ, оның аумағы Байкал көлінің су айрығына жатады. Ал күллі өркениетті әлем толыққанды қалдықтарды кәдеге жаратуға әлдеқашан көшкен.

Республиканың табиғи ресурстар министрі Юрий Сафьяновтың айтуынша, бүгінде Бурятияда мұндай нысан жоқ. Қоқыс сұрыптайтын екі ғана бекет бар. Министрдің айтуынша, өңірде қалдықтарды кәдеге жарату мәселесі өте өткір тұр және қоқыс өңдейтін зауыттың салынуы бұл экологиялық мәселені, сонымен қатар, жүйелі түрде шешуге мүмкіндік береді.

Ұлан-Удэде мұндай жобаны жүзеге асыру аймақтағы экологиялық жағдайды айтарлықтай жақсартатыны сөзсіз. Бұл кешен, алдын ала есептеулер бойынша, жыл сайын 200 мың тоннаға дейін қалдықты өңдеуге қауқарлы. Сонымен қатар, жаңа қоқыс өңдеу зауыты Бурятия үшін жүзге жуық жаңа жұмыс орны болып табылады.

Бұл жоба сонымен қатар қалдықтар мен қоқыстарды жағуға арналған шағын электр станциясын құруды қамтиды. Бұл ретте шағын ЖЭО 40 МВт жылу мен 3,5 МВт электр энергиясын өндіріп, Ұлан-Удэдегі бірнеше тұрғын үй шағын аудандарын жылытуға мүмкіндік береді.

Өздеріңіз білесіздер, бұл экологиялық жоба қазірдің өзінде мемлекеттік сараптамаға жіберілді. Ал, сарапшылардың пікірінше, бұл жоба негізінен бүкіл ел үшін пилоттық жоба болып табылады, өйткені ол қалдықтарды кәдеге жаратуда соңғы технологияларды қолданады.