Ресей Федерациясының Қорғаныс министрлігі Қырым түбегіндегі тұщы суды жеткізуді қамтамасыз етеді.

Ресей Федерациясы Қорғаныс министрлігі ұйымдастырған ауыз суды жеткізу Қырым түбегі аумағында басталды. Қорғаныс министрлігінің материалдық-техникалық қамтамасыз ету бөлімшелеріне Ресейдің жаңа аймағын сумен жабдықтау жүйесін орнату тапсырылды.

Қорғаныс министрлігінің баспасөз қызметі Феодосияға жақын орналасқан Старый Қырым қаласында артезиан ұңғысынан ауыз су беріле бастағанын хабарлады. Бес шақырымдық құбырды Батыс әскери округі күзет бригадасының бөлімшесі жүргізді. Жаңа құбыр тәулігіне кемінде 2000 текше метр су беруге қауқарлы.

Ресей әскерилері мұнымен тоқтап қалмақ емес, қазір Қырымдағы бірқатар қалалар мен елді мекендерге су құбырын тарту жұмыстары жүргізілуде. Түбек аумағына жалпы ұзындығы 125 шақырым болатын, тәулігіне тоғыз мың текше метрден астам су беруге қабілетті кеніш құбырларын тарту жоспарлануда.

Бұған дейін Қырым Республикасы Мемлекеттік кеңесі президиумы мүшелерінің бірі Едіп Гафаров Украина билігі бірқатар шарттарды орындағаннан кейін Қырым түбегіне Солтүстік Қырым каналы арқылы су беруді қалпына келтіруге келіскенін хабарлады. Соған қарамастан, Ресей Федерациясының Қорғаныс министрі Сергей Шойгу мамыр айының басында Қырым түбегінің елді мекендерін тұщы сумен қамтамасыз етуге Қорғаныс министрлігінің материалдық-техникалық қамтамасыз ету департаменттерін тарту туралы шешім қабылдады.